ឥណ្ឌូណេស៊ី៖ អាជ្ញាធរបានឱ្យដឹងនៅថ្ងៃទី១១ ខែមីនានេះថា ចំនួនអ្នកស្លាប់ដោយសារទឹកជំនន់ និងការរអិលបាក់ដីនៅលើកោះស៊ូម៉ាត្រា ប្រទេសឥណ្ឌូនេស៊ី បានកើនឡើងដល់ ២៦នាក់ហើយ ខណៈមនុស្សយ៉ាងតិច ១១នាក់នៅតែបន្តបាត់ខ្លួន។  គួរបញ្ជាក់ថា ហេតុការណ៍ភ្លៀងធ្លាក់ខ្លាំងកាលពីថ្ងៃព្រហស្បតិ៍កន្លងទៅ  ដែលបានបង្កឱ្យមានគ្រោះមហន្តរាយនៅក្នុងខេត្តស៊ូម៉ាត្រាខាងលិច ដោយទឹកទន្លេបានជន់ជោរខ្លាំង និងហេតុការណ៍បាក់ច្រាំងបានបង្កឱ្យមានការខូចខាតផ្ទះសម្បែងជាច្រើនខ្នង។ 

បើតាមប្រភពពីមន្រ្តីនៃភ្នាក់ងារកាត់បន្ថយគ្រោះមហន្តរាយនៃកោះស៊ូម៉ាត្រាខាងលិចបានឱ្យដឹងថា គ្រាន់តែនៅក្នុងស្រុក Pesisir Selatan មួយប៉ុណ្ណោះ មានមនុស្សចំនួន ២៣នាក់បានស្លាប់ និងមានមនុស្ស ៦នាក់នៅកំពុងបន្តបាត់ខ្លួន។ បន្ថែមពីនេះ សាកសពចំនួន ៣នាក់ទៀតត្រូវបានគេរកឃើញនៅស្រុក Padang Pariaman ដែលជាទីតាំងរងការខូចខាតយ៉ាងធ្ងន់ធ្ងរផងដែរ។ 

គិតត្រឹមថ្ងៃចន្ទនេះ ក្រុមអ្នកជួយសង្គ្រោះអាចចូលទៅកាន់ទីតាំងរងគ្រោះខ្លាំងបំផុតបានហើយ បន្ថែមពីលើនេះក្រុមសង្គ្រោះក៏បានធ្វើសកម្មភាពចែកចាយជំនួយដល់ជនរងគ្រោះដែលបានជម្លៀសខ្លួន និងផ្តល់សម្ភារៈសំខាន់ៗមួយចំនួនដូចជាតង់, ថ្នាំពេទ្យ និងអាហារមួយចំនួនផងដែរ។ គ្រោះមហន្តរាយនេះក៏បានបំផ្លិចបំផ្លាញលំនៅដ្ឋានរបស់ប្រជាជនរាប់រយខ្នង ស្ពាន វិហារឥស្លាម និងហេដ្ឋារចនាសម្ព័ន្ធសាធារណៈផ្សេងៗជាច្រើនទៀត។ 

គួរឱ្យដឹងដែរថា ភូមិសាស្រ្តឥណ្ឌូណេស៊ី ងាយនឹងកើតមានការបាក់ដីក្នុងរដូវវស្សា ហើយគ្រោះធម្មជាតិកាន់តែធ្ងន់ធ្ងរទៅៗជារៀងរាល់ឆ្នាំ ដែលទីតាំងមួយចំនួនបណ្ដាលឱ្យមានការខូចខាតព្រៃឈើយ៉ាងធ្ងន់ធ្ងរ ព្រមទាំងបង្កឱ្យមានទឹកជំនន់ធ្ងន់ធ្ងរជាច្រើនកន្លែងនៅតំបន់មួយចំនួននៃប្រទេសប្រជុំកោះមួយនេះ៕